Ei hriet seng ta angin tukum Olympic chu Vancouver, Canada ah hmang mek a nih a, eini Hmar nauhai hin ei lo ngai ropui bek naw khawm a lo ni thei, sienkhawm khawvel pumpuia inkhelthiem hai inelna ni a ni leiin inkhelmi hai chun an ngaipawimaw hle a nih. Winter Olympics a ni ang hrimin an inelna hai hi thlasik laia inkhel thei ding chi deu vawng a nih.

Kumtinin TV a inthawk ngawtin lo thlir hlak lang khawm tukum chu ka mit ngeia zu hmu ve ka nuom em em a, vangnei thlak takin kan ruolpa Canada a umin sengso po po mi tum pek dinga an zuom leiin kei khawm Olympic a ni hni ni chun Vancouver, British Columbia ka lo vuong lut ve tah a.

Olympic nek hmanin mipui fe khawm hai hmu nuom um chang a tam. Ram tinin mani ram tanin an khek suou suou a, kei mi buong (brown) pa hin India hang tan ding ni lang khawm ka hmel hin India mi ka put si nawh, China annawleh Japan hang tan ding hlakin kan thiem bawk si nawh. Lungril ruok tak a chu Hmar inkhelthiem pakhat bek hei thang ve hai sien chu India tan ngawr ngawr ding kana dam ka ti a…

Hmar tawng hmang midang an  um ve awm am aw ti a ka hei dak fan vel khawm chun Hmar tawng ri ding reng ka hriet nawh. Ka hnung tieng ka hei thlir chun tlangval pakhat hi a lo um ve a, hi hi chu Hmar ni ngei a tih ti a hei biek ka tum ruol ruol chun a ruolnu tieng a nghah a, Mandarin tawngin a zuk biek nawk zei el a, ka lo biek naw kha a tha ta de aw.. ka ti nawk ta lem a.

Kawngkhata chu eini Hmar inkhawmpui hi a ang vang vang, hmun tin ah thil zawr le thuomhnaw inchaw an um a, kil khingtieng a nunghak tlangval insai an um zing bawk. Thlasik vur dei lai khawm ni sien hi hi ngei hi a ni ding an ta hi Neilal in “Sawrthla tuok suok” a lo ti kha ti chang khawm a tam.

Standard an sangin ram tinin an sportsmen hai an chawisang thiem em em, kei khawm hieng ang hin ka rammi, ka chipui, ka hnam chanpui haihin kan unau chawimawi tlak le, kan mithiem neisun hai tawiawmin chawimawi thiem inla chu hi nek hin kan hnam hi a changkang ding a na aw.. ti dam ka ngaituo malam pei bawk a.

Ring nekin hun a lo fe hrat khawp el a, kei thingtlangpa, kutsinthaw ngei ngei chu zing nisa suok chun ka khumlaizawl chu a hung khaw var ier el ta a. Chu ngei chun le, Olympics inkhel chu la thlakhla hle lang khawm ka hnungtawl san a lo tul tah. Zawlnu zing thingpui sen siem chu ka hei dawn zo a, ka mansapui ka liengkoah batin, chempui ka tatngei a, chuongchun ram tuon zai la lo rel nawk tah a…. Lam tluonin ka mang chu ka ngaituo zawm zing a, tak chang thei sien ka va nuom ngei de aw!!!!

Awleh!! thutak tieng met ah.. Hieng hi Feb 16, 2010, 6:30 Vancouver local time a Medal an dawng dan hai a nih..

As on 23rd February 10:30:

Hun sien
Hmar Tlangval